‘కాంగ్రేజీ’ వాల్‌!

caricature: balaram

caricature: balaram

పేరు :కేజ్రీవాల్‌

దరఖాస్తు చేయు ఉద్యోగం: అర్థాంతరపు ముఖ్యమంత్రి

ముద్దు పేర్లు : ‘కాంగ్రేజీ’ వాల్‌ (కాంగ్రెస్‌తో ‘చెయ్యి’ కలిపాను కదా!), ‘ముప్పావు కేజీ’ వాల్‌ (ఇంక్కొక్క పావు కేజీ (ఎనిమిది) సీట్లు వచ్చి వుంటే, నా అంతట నేనే, ఢిల్లీ ప్రభుత్వాన్ని ఏర్పాటు చేసేవాడిని.

విద్యార్హతలు : మొన్నటి వరకూ ‘ఐఆర్‌ఎస్‌'( ఇండియన్‌ రెవెన్యూ సర్వీస్‌), నేటి నుంచి ‘ఐ డబ్ల్యూ ఎస్‌’ (ఇండియన్‌ వాటర్‌ సర్వీస్‌), ప్రతీ ఇంట్లో ‘ఏడు వందల బాల్చీల(లీటర్ల) నీళ్ళు’ పోద్దామనుకుంటున్నాను. (ఇవ్వక పోతే ముఖ్యమంత్రిగా నేనే బాల్చీ తన్నాల్సి వుంటుంది.)

హోదాలు : సి.ఎం.( అంటే చీఫ్‌ మినిస్టర్‌ కాదండోయ్‌! కామన్‌ మేన్‌ అనగా ‘ఆమ్‌ ఆద్మీ’) అందుకే ‘సెక్యూరిటీ వద్దం’టున్నాను. ‘చీపురు కట్ట’ లు చేతిలో వుండగా వేరే ఆయుధాలున్న మనుషుల రక్షణ నాకెందుకు?

గుర్తింపు చిహ్నాలు :ఒకటి: ఒకప్పుడు ‘అన్నా'(హజారే)కు తమ్ముణ్ణి. ఇప్పుడు అన్ననూ నేనే. తమ్ముణ్ణీ నేనే.

రెండు: అనుభవంలో ‘ఎల్‌ కేజీ’ వాల్‌ని. విజయంలో ‘పీజీ’ వాల్‌ని.

సిధ్ధాంతం : అవును కదా! అలాంటిది ఒకటి వుండాలి. అవినీతిని వ్యతిరేకించటమే పెద్ద సిధ్ధాంతమనుకున్నాను. అయినా సిధ్ధాంతం లేక పోవటం కూడా ఒకందుకు మంచిదే అయ్యింది. లేక పోతే ఏ కాంగ్రెస్‌ని తిట్టి ఇన్ని సీట్లు సాధించానో, అదే కాంగ్రెస్‌ మద్దతుతో ఢిల్లీ సర్కారును స్థాపించటం సాధ్యమయ్యేది కాదు.

వృత్తి : నిన్నటి వరకూ ‘తుడిచేయటం’. ఇప్పుడు ‘తుడిచేసుకోవటం'( అధికారంలోకి వస్తున్నాం కదా! ఆ మాత్రం నేర్చుకోవాలి) ఎన్నికల గుర్తు ‘చీపురు’ లెండి!

హబీలు :1. హామీలే. ఉన్నది ఢిల్లీలో అయినా, గల్లీ,గల్లీకో హామీ ఇచ్చాను. అధికారంలోకి వస్తామనీ, నిజంగా వాటిని తీర్చాల్సివస్తుందని కలగన్నానా? ఏమిటి?

2. షరతులు. మద్దతుకు ముందు చాలా షరతులు పెట్టాను. వాటికి కాంగ్రెస్‌ గానీ, బీజేపీ కానీ ఒప్పుకోవాలీ- అంటే, రాజ్యాంగాన్ని నూటొక్క సార్లు మార్చాలి. ఇప్పుడు షరతులు నాకు నేనే పెట్టుకోవాల్సి వస్తుందేమో! మా పార్టీ ప్రణాళికను కొంచెం మార్చుకుంటే సరిపోతుందేమో!

అనుభవం : ‘రామ్‌ లీలా’ మైదానం లో అన్నా హజారే పక్కన కూర్చున్న అనుభవం తప్ప, ఏ రాజకీయ పదవినీ అలంకరించిన అనుభవం లేదు.

మిత్రులు : ‘ఆమ్‌ ఆద్మీ’ లే నా మిత్రులు. కాంగ్రెస్‌కు వ్యతిరేకం గా నన్ను నిలబెట్టి గెలిపించిందీ వారే, మళ్ళీ అదే కాంగ్రెస్‌తో ‘దోస్తీ’ చెయ్యమని సలహా ఇచ్చిందీ( అభిప్రాయ సేకరణ చేసాను లెండి.) వారే. ఇలా ఎలా అంటారు? అదే ఆశ్చర్యం!

శత్రువులు : బధ్ధ శత్రువయిన కాంగ్రెస్‌ నే మిత్రుడిగా ప్రకటించాక, ఇంకా శత్రువులెవరుంటారు చెప్పండి!

మిత్రశత్రువులు : ‘కాషాయ దళం’ వారూ కాంగ్రెస్‌ ను వ్యతిరేకించారు. నేనూ కాంగ్రెస్‌ను వ్యతిరేకించాను. కానీ, నేనే పోటీలో లేకుంటే తాము గెలిచేవారిమని వారి దురాశ. అసలు రహస్యం వారికి తెలియదు. నాకు పడినవి ‘నోటా’ ( పైన ఇచ్చిన పేర్లేవీ కావు) వోట్లు. అంటే కాంగ్రెస్‌కీ, బీజేపీకీ వేయటానికి ఇష్టంలేని వారు నాకు వేశారు.

వేదాంతం : ఏ రోజు కా రోజు ‘ఏక్‌ దిన్‌ కా సుల్తాన్‌’ అని గడిపేయటానికి మించిన వేదాంతం లేదు. రేపు నేను ఢిల్లీ పీఠం ఎక్కాక ఇలాగే అనుకుంటాను.( ఎప్పుడు ఎవరు ‘చెయ్యి’స్తారో తెలియదు)

జీవిత ధ్యేయం : తీరిపోయింది. ‘చీపురు’ ‘చేతి’ కిచ్చెయ్యటమే కదా!

-సతీష్‌ చందర్‌

(గ్రేట్ ఆంధ్ర వారపత్రిక 28 డిశంబరు2013- 3 జనవరి 2014 సంచికలోప్రచురితం)

4 comments for “‘కాంగ్రేజీ’ వాల్‌!

Leave a Reply